14962605_1457127250967290_7568171097248132317_n

Long  Fraede 18 Novemba 2016, ova haf blong ol Haoshol mo populesen blong Vanuatu i kaontem olgeta finis tru long las two wiks. Wok blong kaontem evriwan I bin stat long namba 7 Novemba finis mo bae filwok blong kaontem evriwan bae I finis bifo en blong manis ia Novemba 2016.

Ofis blong Statistiks hemi wantem aknolejem sapot blong evriwan we oli koperet wetem ofis blong Statistik long wok ia. Ikat ova long 300 man mo woman blong wok we oli stap wokabaot raon long kaontri tru long ol komiuniti blong mekem ol wok ia.

Ofis blong Statistik I wantem rimaendem evriwan se Akt blong Statistiks hemi givim pawa long Ofis ia nomo hemi mekem wok blong Senses. Insaed long Akt blong Statistiks, hemi wan ofens blong refiusem ol wokman blong Senses o provaedem ol kiaman infomesen long olgeta. Anda long Akt, bae ofis I save mekem olketa we oli refius o kiaman long infomesen blong pem wan faen, pas long kot mo ko long kalabus, o mekem tufala evriwan.

Tingting blong gat wan Mini Senses hemi kam afta Kaontri I bin ko tru long bikfala disasta blong hariken mo long fala drae sisen we I affektem plante pipol long kaontri. Ofis blong Statistik I wantem stresem tu se wok blong Mini Senses ino rileit long eni politikol pati, inkam tax o eni narafala tingting we pipol oli bin stap tingting long hem. Wok blong senses hemi blong helpem planing mo desisen blong gavman wetem ol stekholda blong we I inkludim ol divelopmen patna, ol bisnis haos, mo jenerol pablik. Hemia hemi inkludim tu lo saed blong save pripea gud long nara disasta we bae I kam lo fiuja.

Ol infomesen yu stap providem hemi konfidensel oltaem mo hemi tabu blong Ofis blong Statistiks blong rilisim ol individual infomesen blong wanwan pesen iko long eni wan.
Ofis blong statistic hemi stap apil long evri lida blong komiuniti mo ol wanwan pesen we I stap liv insaed long kaontri ia blong oli tink hevi lo wok ia mo koperet blong mekem sua se yumi gat wan gudfala infomesen mo semtaem, no mestem eniwan long Mini Senses ia.

Sipos yu gat ol kwesten, plis kolem ofis long 22110 o email long stats@vanuatu.gov.vu

Tankio tumas mo Ofis I luk fowod long gudfala koperesen blong evriwan

Advertisements